Madaxweynihii hore ee Faransiiska, Nicolas Sarkozy, ayaa waayay abaalmarinta Legion d’Honneur oo ah tan ugu sarreysa Faransiiska. Sababtu waxay tahay inuu helay xukun xarig ah oo ka badan hal sano kadib markii lagu helay dambiga musuqmaasuqa, sidaas darteed wuxuu si toos ah u luminayaa billadaas sida uu qabo sharciga.
Madaxweyne Macron, oo ah madaxa sare ee ururka, markii hore wuu diiday inuu Sarkozy ka qaado abaalmarinta, isagoo sheegay inuu u qalmo ixtiraam maadaama uu horey madaxweyne u soo noqday. Sarkozy waxaa loo magacaabay chevalier sanadkii 2005, waxaana si toos ah loogu dallacsiiyay darajada grand-croix markii loo doortay madaxweyne labo sano kadib.
Kadib markii Macron go’aankaas qaatay, xubno qoyska u ahaa dad kale oo haysta billadda ayaa maxkamad u aaday. Waxay ku doodeen in ka saarista Sarkozy aysan ahayn in la xushmad darreeyo xilka madaxweynenimo, balse ay muujineyso ilaalinta sumcadda abaalmarinta. Maxkamaddu way ku raacday. Go’aankaas ayaa maanta si rasmi ah loogu daabacay wargeyska rasmiga ah ee dowladda.
Sarkozy wuxuu sidoo kale lumiyay xilkii uu ku lahaa Ururka Qaranka ee Abaalmarinta (Ordre National du Mérite). Labadiisii eedaysane ee kale ayaa sidoo kale waayay labadii darajo ee ay haysteen.
Khiyaano Qaran
Tani waa markii labaad ee madaxwaynaha Faransiiska laga qaado abaalmarinta ugu sarreysa dalka. Markii ugu horreysay waxay ahayd bishii Agoosto 1945, markii Marshaalkii Pétain laga qaaday abaalmarinta sababtoo ah wuxuu la shaqeeyay Nazi-yadii xilligii maamulkii Vichy.
Sarkozy waxaa sanadkii hore lagu xukumay dambiga musuqmaasuq kadib markii uu sarkaal sare u ballanqaaday waxyaabo uu uga faa’iideynayo, si uu uga helo xog sir ah sanadkii 2014. Waxaa lagu xukumay saddex sano oo xarig ah, laba sano oo ka mid ahna waa la hakiyay. Kadib markii la dhimay xukunka, wuxuu ugu dambeyn ku dhamaystay saddex bilood oo xabsi guri ah.
Sidoo kale Sarkozy waxaa loo haystaa inuu aqbalay malaayiin euro oo laaluush ah oo laga siiyay xukuumaddii Liibiya ee Qaddafi, si uu uga maalgeliyo ololihiisii doorashada ee 2007. Go’aan maxkamadeed ayaa la filayaa bisha Sebtember.
JSN
Isha: editorial
Wixii faah faahin nagala soo xiriir editorial@somalidutchuk.nl