Isniin, 9-Juunyo-2025: [JSN] Habeennadii Sabtida iyo Axadda, koox muwaadiniin ah oo Dutch ah ayaa isugu soo baxay xadka u dhexeeya Ter Apel (Nederland) iyo Rütenbrock (Jarmalka), iyagoo damacsanaa inay sameeyaan kormeer xuduudeed u gaar ah si ay u joojiyaan dadka magangalyada doonaya ee doonaya inay u soo gudbaan Nederland. Sida ay sheegtay NOS, cidna lama joojin.
Biliis fara badan oo Nederlandees iyo Jarmal ah ayaa goobta joogay, iyagoo wata baabuurta booliska dhinac walba ee xadka. Sida uu sheegay RTV Noord, boolisku waxay hubiyeen aqoonsiyada dadka Dutch-ka ah ee isku dayay kormeerka. Dadkan Dutch-ka ah waxay xirnaayeen jaakadaha milicsiga leh waxayna wateen nalal gacmeedyo.
Habeenkii Sabtida, koox kale oo la mid ah kuwaas oo wata jaakado milicsi leh iyo ulaha iftiinka leh ayaa iyana yimid xadka. Waxay baabuurta ka imanaysay dhanka Jarmalka uga yeerayeen inay hareeraha u baxaan, kaddibna waxay baadhayeen baabuurta si ay u ogaadaan in ay wataan magangalyo-doon.
Degmada Westerwolde oo ay ku jirto Ter Apel ayaa falkaas ku tilmaantay mid khatar ah oo aad u halis badan. Degmadu waxay dadka xasuusisay in ay sharci darro tahay in baabuurta si shakhsi ah loo joojiyo. Waxaa sidoo kale sharci darro ah in la hor istaago qof doonaya inuu codsado magangalyo, arrin uu xusay Xafiiska Xisaabiyaha Qaranka toddobaadkii hore markuu daabacay qiimeynta afar bilood ee ugu horreysay ee kormeerka xuduudaha dowladda.
Hoggaamiyaha xisbiga PVV Geert Wilders ayaa tallaabadan dadweynaha ku tilmaamay “hindise cajiib ah” oo uu sheegay in “laga fuliyo xuduud kasta.” Wilders ayaa todobaadkii hore dumiyay xukuumaddii Schoof I isagoo sheegay in dowladda ay dib u dhac ku tahay fulinta siyaasadda magangalyada ee ugu adag taariikhda, taas oo la ballan qaaday markii xukuumaddu la dhisay. Si kastaba ha ahaatee, Wilders ma xusin in wasiirka arrimaha magangalyada ee PVV, Marjolein Faber, ay ahayd mas’uulka ka gaarka ah ee hirgelinta siyaasaddaas.
Wasiirka ku-meel-gaarka ah ee Caddaaladda iyo Amniga, David van Weel, ayaa afhayeenkiisa u maray isagoo sheegay inuu fahmayo carooyinka muwaadiniinta, hase yeeshee wuxuu ku boorriyay inay “taas ka waantoobaan” oo ay u hoggaansamaan sharciga.
Dhanka kale, saddexda xisbi ee ka hadhay isbahaysigii xukunka ayaa hadda isku haya cidda la wareegi doonta mas’uuliyadda arrimaha magangalyada ee laga qaaday PVV. Xisbiyada VVD, NSC, iyo BBB ayaa dhammaantood doonaya inay gacanta ku dhigaan feylka si ay muwaadiniinta ugu muujiyaan inay ka wanaagsan yihiin PVV.
Ilaa xal laga gaaro, feylka arrimaha magangalyada waxaa si ku-meel-gaar ah u maamuli doona Wasiirka Caddaaladda Van Weel (VVD), maadaama xukuumadihii hore uu xafiiskaas lahaa arrimaha magangalyada.
SJN
Xiriir la leh qormadaan:
Wixii faah faahin nagala soo xiriir editorial@somalidutchuk.nl